متعة صيد الضبان تكمن ( حلوه تكمن ) في مواقفها الطريفة الخالية من التصنع والتكلف ناهيكم وذي بعد حلوه عن لذة اللحيمات والعضيدات وتقشير العكرة وتعريشها ولا تهون السلايق وخاصه اذا صارت واصلة اذان الضب ( مع اني والله مدري وين اذانه فيه ) لكن الناس في الوقت هذا مختلفين احد يقول ان متعتها في صيدها ومطاردها واحد يقول في مقابلها على الصحن وكل واحد وذوقه    يعني كلها تنصب في جحر واحد اقصد في قالب واحد ، وبما ان الشي بالشي يذكر فانا حبيت اذكر لكم بعض القصص والمواقف اللي حصلت في رحلات القنص . ولو يسمح لنا المخرج   ... الحين نشوف اللقطات مع بعض

ملاحظه : الياي يمتنعون يعني اذا كنت من اصحاب الكبود اللي تحوم  وتقلب فلا تقرا الموقف هذا  اطمره   

واحد طلع مع اثنين من ربعه وما قصر جاب العدة كلها جركل مويه ولي  لشفط المويه وسيارته مفلفل والديها بنزيم وحطو رحالهم عند هاك الجحر ، قام اخونا الفزوع من العجله والفرحه واخذ لي المويه ( القديم المعفن ) وحطه في الجركل وقام يشفط ويشفط ومن ردى الحظ صار داخل في وسط اللي حشرة يقولون انها  فرخ خنفسانه ومع قوة الشفط راحت في بطن الرجال ويالله عقب الطقاق والتطريش وبعععع  وبععع  طلعت الخنفسه دايخه وصارت هاك الطلعه من اولها بايخه  

اثنين تواعدو انهم يروحون يصيدون ضبان وخذو معهم شوزن وشافوا ذيك المكون اللي مرتزه فوق النثيلة ( شكلها تهيض ) ما تبي الا من يرجدها المهم الاثنين ذولي قاموا يتعازمون كل واحد يقول للثاني ارمها خايف من الشوزن ترجده وما بين رده وهاته  رجعوا للديره ما رموا ولا رميه ؟؟؟؟ - طيب وشوله يطلعون من الاساس -؟

واحد دخل يده في الجحر ونغزته شوكه حاده في الجحر الظاهر مدربيتها الهوا لأن الجحر حوله سلمه يابسه المهم رفيقنا ذا سحب يده وقال لخويه من الروعه بسررررعه اربط يدي وتكها وطيران لللأسعاف قبل لا امووووووووووت   

ايضا هذا واحد دخل يده في الجحر ومسك شي وسحبه واثره ورر وانتم  خابرين الورر شكله وقح ويخوف  يجيب القشعريره رفيقنا يوم شافه اصفر وجهه واخضر ونطله بسرعه وليت الوضع توقف عند  هيك الورر من الصوقه قام يطارد خوينا وعينك ما تشوف الا الغبار  

واحد  قال له اخوه الصغير ابيك تجيب على دربك  سحيلي والسحيلي للي ما يعرفه هو ضب صغير عمره ما يتعدى اربع ثواني  والرجال اول مره يطلع يضبب وشاف هاك السحليه وخذ يا مطارد الين صادها وجابها  لأخوه عاد اخوه استغرب وقال له ليش بها املس ما ينغز ؟؟؟ رد عليه اخوه وقال لا توه صغير حبيبي   كلها كم يوم  ويدز الشوك ؟؟؟

فيه ناس رايقين مره وسيعين صدر شافوا جحر وما صدقوا على الله نزلو المسحات والكريك والعتله وخذ يا حفر حوالي 3 ساعات الين طلع الجحر كنه ( مدي )  وآخرتها صار الجحر مهجور وصاحبه مغرور وربعنا عيونهم من التعب تلف وتدوووور