|
ابشركم جيت من سنغافورة ، لا يطلع الواحد منكم الا ومعه هديته سبحه وقريض ومن هالنمونه ، قلت خل امر البطحاء واجيب لكم علشان تدرون اني ما نسيتكم ، واكيد انكم متشوقين تبون تدرون وش صار لي هناك انا ابعلمكم بالتفصيل الممل وبدون كبك وهذي هي سالفة الروحه شوفوها قصدي اقروها بصراحة شي يهبّل ويطيّر العقل ، عالم ثانية ، وحياة دقيقة خخخخ تصدقون اول ما نزلت ديرتهم كنت فاق خشتي ومستغرب وش هالروعه وش هالتغير الجذري مع اني مدري وش معنى جذري لكن الظاهر انها في مكانها ولا تدققون بالحيل ، المهم كنت كاشخ ولابس نظارات وصارّ الجنز غادي مقفاي كنه حبتين خوخ يالله من فضلك وقعدت اتلفت واتديّر في هالديره وأطب في كل من يوافيني عاد قروي جاي من صباخ القراين من قده كلش متغير عليه ، عاد تدرون ان عندهم اشياء مختلفه وهالاشياء حبيت اسردها لكم علشان تدرون وش هالتغير الجذري وش يصير ، أولا لقيت الموز عندهم طوال مره يعني تقعد تاكلها من عقب الغدا الين العصر ما خلصت منها وقشرتها لو ينطلونها في الشارع قلبت السيارة ؟ ثانيا الجح عندهم يجلبونه بعربات ما عندهم جموس ولا شي يعني لا طرطره ولا صجّه والجحه مافيها الا عبسه وحده في كل حبّه وعشان كذا غالي مره ودايم تلقاهم يشرطون قبل لا يشرونها انها تكون على الحبه مهوب على السكين مثلنا ، ثالثا ، التمر عندهم مافيه عبس تاكله على طول وسألت راعيه وقلت له وشلون تبذرونه اجل مادام مافيه عبس ؟ قال العامل ( هذا في عسيب في خلي شمس بئدين في طحن بئدين دفن ) والله شي وحنا نجدع هالعسبان وبزارينا يفحطون بهن ، رابعا ، المطر هناك جايب جهده وحقين هالعربات ورا السيارات يسوون رشة تدرون ليش ؟ عشان تصير عرباتهم متوسخه ويرحمونهم الزباين ويشرون منهم ، خامسا ، البقر عندهم متعافي اذا شفت البقره وهي ترعى في العشب مزغدده ما شاء الله مهوب مثل بقرنا الله يرحم الحال ضعيفات ما ياكلن الا غسال وقشور بردقان وجرواه وضلوعهن يشققن الكور من زود العصله ، سادسا ، محلاتهم رهيبه اذا دخلت على الخياط لقيته ما يرفع راسه ما غير ينظم ويديه تمشي ثلاثة آلاف من السرعه يعني لو تفصل عنده ثوب يقول مرني عقب ربع ساعه او خذ لك لفيفه وتعال ، واللي قاهرني وباط سبدي انه ينظم الابره من أول نغزه ؟ مع ان عيونه صغار ؟ اثر الدعوى مهيب على كبر العيون ، أما الحلاق يوم دخلت عليه لقيت محله مسكت كنك داخل حديقه من كثر الزهور والورود وقلت ابجربه واشوف المهم جلست على الكرسي ونزلت نظاراتي والسماعات حقات المسجل وكنت وقتها مشغل فطومه ماعلينا المهم اشرت له على دقني مع ان دقني مافيه الا شعيرات مثل شعيرات بباي بس كذا لقافه ، وقام الحلاق يزين ويدهن ويحط هذا ويفرك هذا وطلعت من عنده وانا ظر في المرايه والا اللي جالس مهوب انا تغير شكلي مره وانا اطلع من عنده وما غير هالبنيات يلاحقنني عقب التحسينات ، اجل الله يخلف حلاقينا اذا حط يده عند خشتك يبي يحدد الشنب كتمت النفس من ريحة يديه اللي فايحه بكشنة البارح ، سابعا ، السياكل عندهم فيذاك مهيب مثلنا تصدقون شفت سياكل بكفر واحد في الوسط وسياكل لها كفرين اللي قدام طوله حول سته متر اما الكفر الثاني اللي ورا فهو صغير ما يجي طوله شبر ، ياويلهم من الله راصين راصين هالكفر الصغير بالحموله وتاركين هالكمخه اللي قدام ماعليه الا الدركسون ،ثامنا ، الضبان ياويلي عليهن يوم شفت الربيع فارش الارض قلت ما بدهاش يا ولد ابروح اقنص اكيد ضببتهم مربعه ورحت للبر حقهم وانهبلت يوم شفتهن متسدحات وبطن الواحد عرض قربة الماء واذا قربت من يمه ما يعط ، ولا يوش ابد يعطيك عمره ، عاد محاكيكم يوم شاف الضب ما ينحاش قام وجاب له خياش ( حلوه والله تنفع اغنيه ) وسقطت كم واحد منهن وجبته معي وكل يوم مع هالرز مافيه الا دبغ ، بيني وبينكم فاقدينهن من كم سنه ولو ان عيونهن صغار لكن ماعليه ، عاد احسن شي لقيته عندهم ولاحظته هو ان ماعندهم لقافه واذا شفت واحد يتلفت كن رقبته مروحة قعادي فاعرف انه من ربعنا يالله صلاح العطا ، عيذهم بالله ما يناظرون الا دروبهم وعشان كذا الاحظ انهم ما يصدمون في بعض او يتدربون في كراتين البياعين والمواعين ، هذي غير بعض الأمور اللي حصلت لا يمكن الوصول اليها ؟ وجيت راجع وانا مسفهل وناقع الدم في وجهي واللي شافوني عقب ما جيت ماعرفوني يقولون مبيض وزاينه حالك وانا اسكتهم واقول ان عندهم ربيع فيذاك وقاعد ارعى ولا فيه شموس تشوي الطيور وتلعب في حسبة الوجه ، واللي مضيق صدري اني نسيت الجنز في شقتي هناك وكنت حاب انه يكون ذكرى اذا كبرت واللي مضيق صدري اكثر ومخليني اهوجس كل يوم هو اني اخاف انهم يعقدون لي فيه ثم ما عاد تشوفوني ابـــد ....؟؟؟؟
|